باسمع كلامك
ووحشاني ضحكتك
وأول ما ضحكتي قلتلك
دي أول مرة أسمع منك الضحكاية دي
حاسسك ساعتها أبتسمتي
يمكن في مرة عليا كدبتي
بس اليوم ما كانش فيه كدب
كنتي مصدقة العقل اللي بيكلمك
والشيخ اللي كان زمان بينصحك
إحساس
إني عايز أأكلك الكعك بأيدي
وكمان حتة بيتيفور
بالمربة اللي شبه طعمك
ولونها زي شفايفك
وقت أما تضحكي
مربة فراولة
وفيها حتت الفراولة منتشرة
بحبها كتير
بس مش أكتر منك
علشان أنتي اللي بتديها طعم
وساعات اليأس
أنتي بتديها روح
وساعات الحزن في عيونك بتفرحيني
يمكن مش انتي الوحيدة اللي فحياتي
بس أنتي النور اللي مليها
10 تعليقات:
اولا كل سنة وانت طيب ورمضان كريم "بيتى فور وفراولة"شكلك رجعت تحب الاكل من جديد بس الاسم حلو وكمان القصيدة لذيذة .بس انا حاسة انك دلوقتى بقيت احسن وبتكتب قصايد فيها تفاؤل حلو كتير التقدم ده جو اون.عجبتنى كمان صراحتك فى القصيدة"يمكن مش انتى الوحيدة اللى فحياتى"خليك صريح دائما .كتاباتك دايما تنول اعجاب الجميع
بجد مش عارفة أقولك ايه ماعنديش أي تعليق غير كلمة واحدة(لذيذة مووووت) فعلا عجبتني مش عارفة ليه وانا بقرأها فضلت مبتسمةوعجباني جدا واما خلصت بصيت في المراية لقيت وشي لون الفراولة ههههههه
اه نسيت أقولك ازيك ياواد علشان تعرفني
انت ازيك انا مش ناسياك ولا حاجة بدليل اني تاني واحدة أعلق علي قصيدتك الجميلة ده مستنية الباقي البسكويت واللانكشير والغريبة وياميش رمضان كمان ههههههه
شوفت يا محمد ماحدش جاب لي فانوس ده أول سنة من18سنة مايجيليش فيها فانوس انا هاعيط
هاى انا كمان ما حدش جاب لى فانوس المفروض محمد لانه اخونا الكبير يجيب لنا احنا الاتنين فانوسين بس انا بحب اللون البينك او الفايلوت وياريت كمان يكون بيغنى اغنية نانسى الجديدة"بتفكر فى ايه" لانى بحبها خلاص اتفقنا. هتجيب الفوانيس ولا هتطلع بخيل ههههههههه.انا هستنى فانوسى.وكمان عايزة بيتى فور وفراولةوبسكويت وكمان شيكولاتة وكفاية كده مش هتقل عليك.
انا عارفة انه مش هيجيب حاجة يا حبيبتي اصله بخيل هههههه
او ممكن يجيب لنا احنا الاتنين فانوسين صغيرين باتنين جنيه ولا ايه يا شاعر
انا شخصيا شاعرة انك هتنفض لنا علي العموم كل سنة وانت طيب ورمضان كريم
اه صايم ولا زي كل سنة؟!!!!
حقيقي يا محمد النص عجبني جدا
الايقاع الهادئ المنتظم حتى الوصول للنهاية بحالة من التشبع والمتعة كانها سوناتا عذبة تربت على النفس لتهدئها
التعبيرات السلسة والتركيبات البسيطة الحساسة بعيدا عن التعقيدات المربكة لك ولكتابتك
العنوان العذب الرقيق المعبر عن حالة نعومة وتصالح ومحبة كاملة
يعني بجد ده اجمل حاجة عامية اقراهالك
وطبعا اكتر شئ يهمني ويعجبني يا حمادة اني بقيت واثق في قدرتك على ترجمة المواقف الجوهرية الحساسة في حياتك الى نصوص شعرية لا تفقدها الواقعية والمحاكاة أي جزء من شعريتها البسيطة الجذابة بل تضيف لها شيئا من التماسك والحيوية
انا عندي ملاحظتين صغننتين بس
أولا
إيه اللي جاب الكعك والبتيفور بالذات في دماغك؟؟؟
ده مجرد سؤال غتاتة :)))))
يعني احنا في رمضان مش في العيد يعني فكان طبيعي ان المجاز ييجي عن البلح الطايب الطري المسكر الممتع :p
هههه
ولا يهمك
ثاني ملاحظة
واستحمل رخامتي فيها بقى يا ريس
يعني ايه
يمكن مش انتي الوحيدة اللي فحياتي
بس أنتي النور اللي مليها
انا مش فاهم
اولا
مستحيل تكون بتحب واحدة وهيا النور بتاع حياتك وف نفس الوقت متبقاش هيا حبك الاوحد
ثانيا
محستش ان فيه صلة بين المعنيين
يعني ايه العلاقة بين الجملة دي والجملة دي؟؟؟
ثالثا
طالما هيا النور اللي ف حياتك يبقى تحترم نفسك وتكتفي بيها ومش محتاج اي حد غيرها والا ميبقاش حب
رابعا
مين تاني ف حياتك يعني يا عم ما احنا دافنينه سوا؟؟ انت هتعمللي فيها عم الدنجوان
وللا يمكن تقصدني انا بالناس التانية اللي ف حياتك :p
كده تبقى بتحرجني
بس لو كده ازاي بقى يا معفن مبقاش أنا النور بتاع حياتك؟؟؟
ماشي ماشي
طب والله ما انا واخدك التكية تاني
وابقى خللي اي حد يشوف معاك ماتشات الزمالك
يا زمالكاوي يا مهزوم يا مهزوم يا مهزوم :p
عامة انا مسامحك
لان على راي الشاعر
وقفة الراجل (انا يعني) بميت ست
لكن لو جت الست يغور الراجل
اغور انا بقى يا ميندووووووو
رمضان كريم يا ريس :))))))))))
آااااه صحيح
أنا كمان عايز فانوس
انا مجاليش فوانيش من ساعت ما ماما ماتت
اهئ اهئ
الملاك النبيتي البدين :)
كل سنة وانت طيب يا محماااااااااااد
هاي..ازيك عامل ايه
كل سنة وانت طيب وعقبال100سنة وتبقي عجوز وأسنانك مكسرة
ويارب تعيش أجمل وأسعد حياة ويبقي عندك أطفال صغننين و أحفاد كمان
ابتسامة أعلم مصدرها جيداً
شعور داخلي بالمش عارفة اية دة بس هوه احساس حلو
ضحكة لا اعلم لماذا
جميلة البتاعة اللي حضرتك كاتبها
تسلم ايدك
سلام عليك
إرسال تعليق